城中鏡：競步籌款賽 名人鬥快行善
今年嘅「小母牛競步善行」尋日喺大埔大美督舉行，好多政商界人士為做善事都不遺餘力，其中小母牛香港分會籌款委員會主席、「快勞夾大王」杜振源，雖然自己無份落場跑，由囝囝杜擴業落場應戰，期間仲發生一段小插曲。
杜振源（右）自己無落場跑，囝囝杜擴業意外跑咗人生第一次半馬賽事。
葉樹堃（右）同太太齊齊為細仔Ian（左）撐場打氣。
羅詠詩（右）一家三口齊齊支持慈善跑。
話說杜擴業原先諗住報名參加十公里賽，點知當場仲有其他田徑團體舉行半馬賽事，但杜擴業只係顧住向前跑，因此意外地跑咗人生第一次半馬，好彩最尾體力都足以應付到。
同樣一家大細現身支持，有小母牛香港分會主席梁錦松、副主席Stephen葉樹堃、籌款委員會副主席王庭聰等人，其中梁錦松帶埋兩位囝囝到場，一齊參與三公里親子賽；Stephen就同平時有跑開步嘅細仔Ian葉瀚華一齊出席親子賽，Ian話成段路程最辛苦一定係上落斜嗰段，少啲體力都應付唔嚟。
羅詠詩親子內地扶貧
今年加入小母牛香港分會大家庭、籌款委員會委員羅詠詩亦同老公、囝囝齊齊支持活動，佢仲預告一家人遲啲會參加小母牛於內地扶貧探訪活動，趁機畀囝囝體驗生活喎。
講番今年嘅籌款成績，一共籌到二百五十萬元，而第一次舉辦十公里長跑賽亦吸引九百多人參加，證明本港仲有好多人，都係為善不甘後人。
