世界紛擾，人心不靜，思想紊亂，黑白混淆得是非難辨，是對是錯，上帝也捏不穩，說不清！

香港自由黨黨魁田大少公然叫特首「考慮辭職」，就被中共中央以犯天條不可赦之名，撤銷其政協委員職務；田大少開記招回應，話當日無留意到自己係「全國政協身份」，淨係記得係香港立法會議員、自由黨黨魁，仲話平常只會喺返大陸開會嗰兩三日至覺得自己係「政協」。今劑喺香港地區內公開叫特首考慮辭職，係以立法會議員，定係自由黨黨魁身份發聲先？佢話係以「個人身份」講真話喎！哦！收到！

香港無綫電視新聞部記者採訪藍絲帶社團活動時，被暴徒施襲，無綫逾三百名員工在網上聯署譴責暴力，並要求管理層保障前線員工安全，卻引起非戲劇製作總監余詠珊出手，傳佢指摘員工聯署係「反公司」行為，要求參與員工盡快自動刪除簽名，否則革職或扣花紅作懲罰，事件曝光後，嚇得余總監連原本要出席的新劇記招也不敢蒲頭；及後，佢透過公關部發聲明，澄清當日只係在一個「內部會議」，以「個人身份」說話，卻被人斷章取義喎！哦！又收到！

究竟，在一個自詡自由的社會裏，一個人有無「個人身份」的呢？有個林老師放學買完餸，路見不平之嘛！後果如何呢？佢不是以個人身份發言嗎？

有一男子係每個月袋公帑的廢柴政府高層，卻以「個人身份」去網上簽名支持薑蓉的維穩活動，不但無周身蟻，反而有功勞添！點解呢個社會咁唔公平嘅？我真不懂，偉大的上帝，你知道點解嗎？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps