政壇：搞搞政：屢幫吳得掂執爛攤常秘頂唔順想閃人
被嘲為「吳得掂」嘅教育局局長吳克儉同常任秘書長謝凌潔貞唔咬弦，係官場公開秘密，有傳因佔領行動同學界罷課，佢哋嘅關係更爆發至臨界點添！
設計圖片及對白
吳得掂前年七月上任教育局局長，由一○年十二月開始出任教育局常秘嘅謝太輔助，原本以為一新一舊配搭可以互補不足，但唔使一陣已傳出佢哋唔咬弦，其中吳得掂處理政治炸彈嘅能力係不言而喻，大家喺前年反國教一役領教過，至於謝太性格強悍，有傳佢非常不滿吳得掂成日借考察為名周圍飛，變相留低爛攤子要佢執手尾。
舉例指，大專學生喺九月下旬發起罷課，吳得掂就揀正呢個關鍵時刻放大假，謝太又要忙於撲火，及至尋日教育局又出稿，指吳得掂今日會率領教育代表團去德國同瑞士訪問五日，了解當地職業教育制度，謝太要再次留港打點局內事務，或者救得火多都有爆發嘅一日，有傳謝太終於向公務員事務局提出調職要求，間接以行動表示頂唔順吳得掂，局方見佢已喺教育局做咗即將滿四年，於是積極為佢物色新歸宿。
傳三政策局拒接收
據悉當局最近向三個政策局「探路」，其中一個政策局更有高民望嘅局長領軍，睇吓嗰三個政策局原有嘅常秘有無興趣或「夠鐘」調職未，聞說謝太本身對新目的地無乜意見，但三個榜上有名嘅政策局就非常頭痛，有人更即時耍手擰頭。
有官場中人擔心，謝太一旦真係調咗過嚟，可能會將爭議風波帶去新嘅政策局，到時局長有幾高民望都無用，根本唔係一時三刻可解決。究竟謝太情歸何處，吳得掂又會否有新常秘輔助「拆彈」？有關方面要好好諗吓兩全其美之策嘞！
