政壇：詩姑中環打的 一度畀人截胡
持續咗超過一個月嘅佔領行動，唔少要喺佔領區附近返工返學嘅市民都受影響，勢估唔到連基本法委員會副主任「詩姑」梁愛詩亦疑身受其害。話說尋日下午喺中環一帶，撞見詩姑眉頭深鎖咁企喺度，原來平時慣以的士代步嘅佢，一直等緊上的士去下一個目的地，但似乎詩姑成功率唔高，截咗一陣的士都截唔到，仲一度畀人截胡添！
梁愛詩於中環街頭截的士，約十分鐘先至上到車。
梁愛詩截的士期間，一度停正喺佢面前都被其他人截胡。
詩姑本來一直喺皇后大道中東行線等緊的士，但唔知係咪見等咗好耐都唔成功，加上眼見對面線就好多的士經過，向來醒目嘅詩姑即時行過去對面截車，點知對面已經有唔少人等緊的士，錯失先機嘅詩姑惟有繼續耐心等待。
可能詩姑一手拎住袋戰利品，另一隻手就拎住手袋，截的士時隻手舉得唔高，搞到唔少的士都直行直過，其中一架的士一度停正喺佢面前，但都畀其他人截胡率先上車，好彩當時唔算係繁忙時間，最終詩姑等咗前後三架車、約十分鐘左右先至上到車。
