政壇：建制派議員秘道不通
由於佔領人士持續佔據金鐘政府總部同立法會附近道路，喺高峰時期仲搞到政總同立法會員工無得揸車返工，而要紛紛改搭交通工具。不過，隨住警方「收復」添華道同龍和道後，通往政總嘅車路已經開通，政府官員可以重新揸車返工。有建制派曾經要求行政署開放政總停車場同立法會停車場中間嘅「秘道」，等議員可以用官員車道直接揸車入立法會，但畀行政署署長蔡潔如領導嘅署方以安全為由拒絕。
設計圖片及對白
有建制派議員投訴，雖然添華道已經開通，但由於一街之隔嘅添美道仲係畀大批示威者佔領，立法會議員唔可以經添美道直接揸車入立法會，而要將架車泊喺立法會附近中信大廈對出空地，再徒步行入立法會。本來要佢哋行多兩步都無所謂，問題係因為行入立法會條路不時有大批佔領人士聚集，當佢哋一見到有建制派議員經過，就會起哄指罵佢哋，有人仲會一路鬧一路跟住佢哋，令佢哋非常狼狽。
唔少建制派議員於是搵秘書長Kenneth陳維安幫手，叫佢游說行政署開放政總停車場通往立法會停車場嘅「秘道」，等佢哋可以循政總停車場入立法會；又或者索性叫警方好似添華道咁喺添美道進行清場，等佢哋可以直接揸車返立會，而唔使經過示威區被人鬧。
恐重演東北撥款亂事
不過，據聞行政署擔心一旦開放政總停車場畀議員自由出入，可能會重演今年六月財務委員會審議新界東北發展前期工程撥款期間，有泛民議員助理堵塞立法會停車場，唔畀其他議員離開立法會嘅情況，所以行政署思前想後，都係唔肯行個方便向立法會議員開放政總停車場，而係由得啲議員繼續偷雞，喺中信大廈附近馬路泊車。
