潮語「跟車太貼」係指有啲人，對一啲事件或一啲言論，未睇清大勢或風向就急不及待發表自己嘅意見同立場。呢啲人通常都係政圈中人，每每見到主子一錘定音之後，就過早發表支持嘅言論。但係一個唔該輿論轉向或主子突然轉軚，呢啲人就會好似「跟車太貼」一樣會撞板，輕則捱批，重則車毀人亡Total Lost。

駕駛執照被停已不經不覺一年幾，仲要等多一年多先至可以揸番車。呢年幾以嚟從來無坐上過司機位，真係唔知第時復牌仲識唔識揸車。就算揸得番，路面感覺都可能大不如前，所以復牌之前，我都要上一上駕駛改進課程，合格先可以復牌。話時話，馬路如虎口，有時唔係自己小心就可以駛得萬年車，遇着一啲超業餘司機又或者駕駛態度差劣嘅人士，隨時會被攬炒，又或者遇着啲酒駕藥駕人士，被佢哋撞埋嚟分分鐘連命都冇！所以，路上揸車，係要打醒十二分精神，顧己及人。習慣唔好「跟車太貼」，記住同前車保持兩秒距程，咁就可以安全些少。

舉個實例，當雨傘運動開始，928警方施放催淚彈鎮壓和平示威者，第二日有行會成員就對住傳媒鏡頭流晒眼淚，話感覺好心痛諗住抽吓水，點知政府即時企硬話自己無錯，仲被親中報章狂批。乜太又跟住即時轉軚改口話自己係為警察而流淚，呢啲行為就係「跟車太貼」。又好似田大少，唔知係咪收到啲咩風，早前突然呼籲行政長官員考慮下台以平息雨傘運動，點知即時被阿爺褫奪全國政協委員資格，唔知佢又係唔係「跟車太貼」惹禍呢？

吓吓跟住人行，跟跟吓原來條隊係排住跳海咁點算？不過好多香港人都係咁，最好唔用腦有飯食有舞跳就得，如果唔係邊度嚟咁多反佔中人士？係咪？

第一手消息請下載on.cc東網iPhone/iPad/Android/Windows Phone Apps