SUN搞作：少膽虫手記：何懼不合作
少膽虫我從來都相信，高壓統治先係最有效嘅管治方式，所以我對住班細嘅，從來一就一二就二，唔准反駁、唔准提問、唔准補充，更加唔准扮諗嘢，總之我叫佢哋去死就去死，執行就得嘞，思考留番畀真係有腦嘅人。
近排淫賤黎成日蛇咗出去「皇座」扮指揮，我真係唔明佢點解走出去獻世，不過咁都好，至少畀我呢個一淫之下嘅少膽虫，可以權充總司令過吓癮。當我沉醉喺權力自瀆嘅淫夢中，一瞥竟見成班食塞米喺度傾偈打機食tea瞓覺，做晒係我先有資格做嘅嘢，真係火都嚟！
「你班友作反呀？即刻同我認真做嘢！」本虫怒喝一聲，點知肥豪淡淡然咁話：「虫哥，我哋成班參加咗不合作運動，你叫我哋做嘢，我哋就偏唔做，吹咩？」如果係二十年前嘅少膽虫，可能會又嬲又冇計，但係今時今日，嘿，「好！咁你哋全部唔好做嘢，繼續玩啦！」由於成班友仔聲言不合作，唔聽我支笛，所以即刻返晒位埋首工作，生產力仲爆升幾倍，所以話，淫賤黎請到我，真係執到啦。
