政壇：搞搞政：新民黨經民聯吼實富貴黨人
立法會議員「田少」田北俊因為叫特首考慮辭職，最終搞到被「搣柴」褫奪全國政協委員資格，仲辭去富貴黨魁一職。該黨以至政協常委都話「搣柴」一事只係針對田少，唔會影響該黨。不過，該黨一向予人感覺都係建制派內嘅「壞孩子」，凡事與政府作對，目的係想喺功能界別以外，同時爭取直選議席，結果搞到兩面不是人，而今後係咪繼續走呢條路線，前景就未必咁樂觀嘞！
設計圖片及對白
相反，新民黨銳意行中產專業路線，副主席田北辰當年仲係喺富貴黨過檔。該黨主席葉劉淑儀尋日喺電台節目打開口牌話，該黨同富貴黨部分黨員及支持者背景相似並且友好，雙方一直有來往，唔排除有人因為近日田少「搣柴」事件轉投佢哋陣營。不過，事後我哋再追問近日有冇人真係表達轉黨意向，葉劉就唔肯多講嘞。
有新民黨中人話，最近都有富貴黨黨員同區議員主動接觸，聲言有興趣過檔，雙方仍在商討之中，最近例子就係舊年元朗區議員陳思靜由富貴黨轉去新民黨。加上今年九月新民黨訪京團，都有富貴黨中常委隨團，所以新民黨對富貴黨中人虎視眈眈，並非空穴來風。
至於由富貴黨分裂出來嘅工商背景政黨經民聯，相信更加係富貴黨黨員另一出路。講到挖角潮，經民聯副主席林健鋒就認為現階段唔使咁急，似乎係謀定而後動。
盛傳有機會接任富貴黨黨魁嘅紡織及製衣界議員鍾國斌就好淡定話，要走嘅黨員都走晒，仲講笑話留低嘅黨員全部都係「死士」，大有「置諸死地而後生」嘅感覺。
