政壇：聯想秒殺小米 手機榜做老三
由雷軍揸Fit嘅小米啱啱喺第三季全球智能手機排名榜位列三甲，但喺短短八小時內將「全球季軍」寶座讓畀聯想，皆因聯想完成向Google收購摩托羅拉移動（摩移）嘅交易，並且併入摩移嘅市佔率後，聯想得以贏小米一個身位。
雷軍
根據IDC與Strategy Analytics（SA）等國際分析機構第三季嘅統計數字，小米首次同時躋身IDC同SA兩大榜嘅三甲位置，市佔率分別係百分之五點三同百分之五點六，但呢個季軍認真短命，聯想計入摩移嘅市佔率急彈至百分之八，即時秒殺小米、華為同LG，小米要喺短時間內挑戰聯想嘅市佔率，恐怕有一定難度。
聯想進身全球三大手機品牌之一，自然早已喺聯想主席楊元慶計劃之內，但佢昨日明言管理層唔會就此滿足，話明依家首要工作係加強整合新併購業務，並且要超越三星同蘋果公司，成為全球智能手機及移動終端嘅一哥。
