政壇：地區勢力强觀塘難佔領

新界鄉紳亦非省油燈

消息話喺佔領行動初期，真係有人發起到觀塘區搞佔領，但點知最後發現佔領者人丁單薄，只得十數人參與，佔領計劃失敗收場。據知班示威者最後佔領唔到觀塘，就走去「佔領麥當勞」，食飽肚後散水，都咪話唔夠戲劇性！

有熟悉觀塘區嘅人士話，就算有示威者佔領觀塘，佢哋都有辦法解決，唔使動用一分警力。咁犀利？因為一旦有人佔領觀塘，好自然會得罪兩班人，包括在觀塘經營嘅紅色小巴線司機，據講班司機行事非常團結，唔會畀任何人攪亂檔。至於另外一班就係工廠佬，就算觀塘近年轉型，開設唔少商廈，但仍然有好多人在工廠打工搵食，佔領觀塘就等於打爛佢哋飯碗，手停口停，相信唔會咁易畀佔領人士得逞。

所以呢兩班人自發清場行動確係唔嘢小，如果佔領人士得罪佢哋，好可能自討苦吃。亦有人士分析，點解啲佔領人士又唔選擇佔領新界區？同樣道理，班新界鄉紳唔係省油的燈，有人攪亂檔必定拚死一戰，至於佔領品流複雜嘅旺角區，佔領後出現嘅大混亂同衝突，實在有辦大家睇，所以講到底都係港島區嘅人比較斯文。

點都好喇，佔領唔成，咁觀塘區議會主席陳振彬都安樂啲，唔使好似中西區咁閉翳，民政事務總署陳甘美華同區議會主席都落過去佔領區，好言相勸班示威者讓番條路出嚟，點知仲要畀示威者冷嘲熱諷。