城中鏡：阿里員工個個有武俠名
阿里巴巴集團主席馬雲熱愛武俠小說，以金庸小說《笑傲江湖》中嘅一代宗師風清揚自居，旗下員工入職時都要揀個武俠小說中嘅人名作為綽號。尋日撞到阿里業務發展部總監徐敏，見佢卡片上印住嘅綽號係「九河」，佢笑住話綽號係嚟自禹疏九河，即係大家耳熟能詳大禹治水嘅傳說，仲話因為入職遲，合適嘅武俠小說人物名稱早就畀同事揀咗嘞！
徐敏笑稱綽號是來自禹疏九河，即是大家耳熟能詳的大禹治水傳說。
徐總話阿里對同事揀選嘅武俠小說人物名稱有要求，要係正面、無爭議性嘅人物，阿里首席執行官陸兆禧用鐵木真作為綽號，而首席風險官邵曉鋒揀選咗用郭靖，但好似《神鵰俠侶》主角楊過呢啲具爭議性嘅名就唔用得。咁有冇同事用同楊過亦師亦友關係嘅鵰兄呢個綽號，徐總就笑笑口話呢個唔係人名所以都無同事用。
另外，阿里巴巴棋高一着，以天貓享有「雙十一」等註冊商標專用權為由，擬多日前提示廣告行家唔好加入侵權之列，一心諗住用「雙十一」類似字眼做宣傳嘅電商對手即時被殺個措手不及。雖然阿里於法有據，但明顯惹來京東商城、蘇寧不滿，蘇寧更形容禁令「手段不義」，更坦言曾策劃「挑戰雙十一」廣告，但早有後着，隔空喊「『雙十一』可以是你的，但是市場永遠是大家的！」。
