城中鏡：啟剛入中出唔係為從政？

中華出入口商會（中出）今年成立六十周年，一連串慶祝活動陸續登場，其中首屆舉辦的「進出口企業大獎」尋日舉行頒獎典禮，政商界人士齊齊去見證開心時刻。啱啱加入中出即當選常務會董嘅霍英東家族長孫霍啟剛亦有到場，對於外界猜測佢入中出係為從政鋪路，佢澄清話完全冇諗過，加入中出都係為咗服務社會。

霍啟剛話加入中出唔係為從政鋪路。

莊成鑫（右二）將交棒畀張學修（右一），拍住黃定光（左二）及中出副秘書長張明敏（左一）齊搞好中出會務。

許華傑（右）同城市大學校董會主席胡曉明（左）歡聚一堂。

早前中出進行改選，其中以啟剛最引人關注，外界揣測佢或有意從政，係想填補霍家喺其父親霍震霆卸下立法會議員後日漸式微嘅政治影響力。不過，啟剛強調中出有好多青聯人，例如立法會進出口界議員黃定光同中出副會長Michael許華傑都做過青聯主席，所以佢入中出係好正常喎！咁邊個叫佢加入？佢就笑而不語喇！

許華傑發掘成功故事

講番頒獎典禮，新當選會長嘅副會長張學修同現任會長莊成鑫都忙於招呼賓客。Michael係活動籌委會召集人，佢笑笑口話，今次係以個人立場去催生呢個獎項，事關佢接手家族紡織生意後，同好多第二、三代一樣覺得好難做，曾經諗過不如收吓租、賺吓快錢好過，佢好想聽吓人哋會點做，於是決定用評選方式發掘成功故事。

今次共有十四間企業獲獎，包括「家電大佬」陳國民掌舵嘅德國寶、從事中藥業生意嘅泉昌有限公司、四洲貿易有限公司同冠華食品菓子廠等，Michael希望活動可以繼續舉辦下去。