政治，正常人要絕對絕對遠離，否則，死無葬身之所！

玩政治的能手，不特只要反口覆舌，滿嘴歪理，勾黨結派，仲要欺下瞞上至得！試問，你還有一丁兒良知的話，點學人玩政治呢？吓嘩！

做咗十六年全國政協委員的香港自由黨前黨魁因當眾公開要求特首辭職下台，人家仍安然坐定定，不受影響，田大少就被佢阿爺斥責「違反全體（政協）決議」而炒咗魷魚。

本來，這個「政協委員會」只是個派餅仔圍威喂的俱樂部，用以統戰收買人心的無實權，亦無實則功效的「虛擬組織」，其設立係供「社會賢達」印卡片時高興吓啫！

田大少被搣柴後，一點也沒有「失落」或「失失慌」，反而仲更加講嘢內容有骨，跟上次二○○三年，硬衝的《廿三條》有明顯表現不同；隨之，不論佢行街或輿論都大有人支持和讚賞，再次成為「香港英雄」。嗱！不特只田大少沒有半毫憂愁，連其黨友周梁、劉健儀等出來見記者，都笑口噬噬，情況反常，有點妖異！喂！畀阿爺揼喎！仲咁Happy？

當全港市民戥田少不值時，咁係中央的「裁決」出咗錯？政治，點會咁簡單吖？哼！唔好畀我批死！

田少已熱身進攻特首寶座作準備了！連佢阿爺也交他劇本，一齊聯合演出也！

否則，我等蟻民也知叫特首下台是死罪時，富貴黨員有大量投資在內地亦不知機？傻的嗎？

你班香港人不是一直話二○一七年特首選舉要有「泛民」入閘的嗎？嗱！依家送件仲勇過泛民的「死士」畀你哋揀，心息未？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps