政壇：搞搞政：富貴黨搵黨魁你推我搪

佢當日都講明唔想元老級人士接手做黨魁，話屬意由「中生代」接任黨魁，大家即刻將焦點轉移去紡織及製衣界議員鍾國斌身上，因為黨內兩大元老包括批發及零售界方剛同飲食界張宇人，其實都無乜興趣接手，加上年紀都有番咁上下，如果接手實在不利黨內接班，如果搞到青黃不接就大件事，所以寧願將重任交託畀後生仔好過。

點知鍾國斌尋日話自己資歷尚淺，難以勝任黨魁一職，仲反建議方剛先係最佳人選。正當兩人互推時，有心水清嘅人就叫大家留意，話黨魁唔一定由佢哋接任，仲有其他人士有機會。邊個？其實同田少相熟，又唔算太老嘅議員，其實唔多，佢就係遲遲都唔肯入黨嘅工業界林大輝。

傳田少望大輝「接管」

有議員透露，呢一兩日田少成日搵大輝密斟，似乎有意喺呢個時候叫大輝「接管」富貴黨，如果真係成事，咁大輝當然順理成章做埋黨魁啦！不過，世事又未必咁完美，因為該黨唔少人都視田少為偶像，但就未必視大輝為偶像嘞，所以大輝要過到黨內一眾反對聲音至得。我哋尋日分別問過兩人回應，但直至截稿前都未有任何答案，更令人懷疑呢場「田林配」係咪密謀成事。

其實，田少喺○八年立會選舉失利，已經即時辭去黨主席職務，當時該黨喺立會內得番三票，主席改由劉健儀出任，捱過四年悲情歲月。當時田少自稱係普通黨員，但仍喺背後指點江山，今次佢辭去黨魁，有知情人士話無論邊個接任都好，最後都係田少喺幕後發功，垂簾聽政。