政壇：抵制拉布被窒鄧家彪掟咪
尋日立法會續會，首先處理對《議事規則》中一項關於點算法定人數嘅技術性修訂，原本呢項議案都無乜爭議性，但勞工界議員Bill鄧家彪發言時就借勢批評泛民主派，話有「拉布」議員成日濫用《議事規則》亂點人數，又話根據英國議會模式，唔係所有法案都要經全體委員會審議，但就被主席曾鈺成裁定發言內容離題，要求佢停止發言。
鄧家彪不滿曾鈺成裁定佢發言離題，發晦氣掟低個咪停止發言。（互聯網圖片）
阿Bill即時駁嘴話主席前日都准「拉布」議員發言離題萬丈，尋日就唔准佢發表個人意見，之後仲發晦氣咁拋下一句「我唔講喇」，掟低個咪停止發言。
經修改嘅《議事規則》訂明，一旦有議員喺委員會審議階段要求點算法定人數，而過咗十五分鐘法定時間都未齊人，主席可以直接宣布流會，而唔使回復立法會大會階段再點一次人數，變相慳番十五分鐘點算法定人數時間。
