政壇：國際單車賽冇路行

早前有消息指呢個單車賽，原本分為專業組同業餘組賽事，前者會圍繞中環海濱嘅龍和道至民耀街作賽，後者從中環龍和道，經西隧、青馬大橋再折返中環，據悉旅發局原定於十一月公布詳情，吸引埋剛參加環北京公路計分賽嘅國際選手參賽，預料參加人數達數千人。不過，依家撞正佔領行動，無論警方係咪支持呢個單車賽，似乎都難以順利舉行，據聞要延至明年舉行，一眾單車發燒友喺中環鬧市嘅「鬥車夢」，頃刻變成泡影。

老實講，政府仲話要吸引多啲遊客嚟香港，依家咁嘅情況肯定係趕客，睇嚟身兼旅遊事務專員、旅發局副主席嘅容偉雄都冇乜板斧可以扭轉局勢。

美酒佳餚巡禮要搬竇

事關有大型盛事因佔領行動要變更舉辦地點或日期非首次，單單係旅發局就試過兩次，一次係香港美酒佳餚巡禮，由原定於中環海濱移師至啟德郵輪碼頭對外空地舉行，另一次就係單車公路賽，認真黑過墨斗！

事實上，旅發局主辦大型活動受佔領行動影響，其實只係冰山一角，之前至少兩個活動同樣因唔明朗因素要取消或被迫延期，首先係原定剛過去周日舉行嘅港鐵競步賽，幸好港鐵照樣會向醫管局捐出一千萬元，支持其社區健康項目；較早時間有主辦單位邀請多名諾貝爾得獎者來港討論可持續發展議題，同樣因佔領行動被迫延期，所以佔領行動一日唔結束，社會運作都唔能夠回復正常。