美孚：66X頻脫班九巴多藉口

九巴66X頻頻脫班，乘客無端端遲大到！溫先生每日皆在美孚乘搭66X線往屯門大興上班，惟因該線經常嚴重脫班，不但令溫大失預算，十月中更候車逾半小時才能登車，「巴士成日脫班搞到我遲大到，八月到依家我已經投訴過幾次，次次投訴完都準時番幾日，之後又係咁！」

66X往返港鐵奧運站至屯門大興，有乘客不滿該線經常脫班致大失預算。

九巴發言人表示，66X在涉事時段的班次應為每十二分鐘一班。經翻查當日行車紀錄，發現有巴士發生機件故障，令車務運作受阻延，站務人員已即時作出車務調動。發言人重申，該公司會繼續留意該線服務情況，有需要時會靈活調配班次，配合乘客需要。

「佢哋次次都係咁講，唔係車長病就係交通擠塞，今次就話壞車，佢哋有冇咁多問題呀？」溫先生坦言不滿九巴的回應，要求九巴履行承諾，提供準時的巴士服務。