城中鏡：入股老恒和 陳志雄望蝕頭賺尾

今年初上市嘅老恒和釀造，上市無耐就曾經被質疑庫存同毛利率過高而遭到拋售，股價亦由十一元樓上碌落四點四八元，近日就突然有主要股權易手，陳志雄大拿拿攞七點七四億元，向主要股東買入約九千六百八十三萬股股份，每股大概八元，以老恒和尋日收報五點六六元，仲有好大折讓喎。

不過，陳氏就再三強調話公司招股價七點一五元，接貨價八蚊唔高，仲大讚老恒和品牌地位崇高，睇好未來生產路線、銷售方式，但就唔會插手公司行政、管理嘅工作。

佢仲話雖然老恒和曾受市場質疑，但自己就做晒研究，參觀晒廠房，希望八蚊嘅接貨價，兩至三年會有百分之百增長喎。值得留意嘅係，陳志雄較早前再認購老恒和非上市認股權證，若獲悉數行使，可增發一億股股份，佢尋日都話會再考慮增持。