城中鏡：佔路生意難做 商界諗計止血
已持續逾月嘅佔領行動，可謂全民皆輸，賠上香港前途，商界陷入水深火熱之中，前晚出席香港傑出企業頒獎禮嘅商界人士，紛紛大吐苦水。香港工業總會主席劉展灝話佔領行動嚇怕個人遊旅客，鐘錶業成重災區，部分商店每日只賣出一、兩隻腕錶，交租都未夠，擔心有老闆因資金周轉不靈，農曆年後恐爆發執笠同裁員潮。
劉展灝（右）恐鐘錶界捱唔住，新年後爆發結業潮。旁為張華峰。
楊哲寧（左）嘅鞋店損失兩成生意額，大感無奈，周浩雲亦擔心「滬港通」落實無期。
陳龍盛（右）嘆旺角網吧生意勁蝕數十萬元，幸好太太謝嘉恩喺背後支持。
頒獎禮匯聚政商界同財經界領袖，但唔少老闆都眉頭深鎖，提起佔領苦況，有冤無路訴。立法會前議員楊孝華大仔楊哲寧透露，其位於中環嘅高級鞋店生意縮水，損失兩成生意額。雖然客源非以個人遊為主，但本地客無心購物，真係神仙都難救，幸好佢年初喺北京開分店，生意拉上補下，尚算可以維持。
青年創業家聯盟前會長Eddy陳龍盛就無咁好彩，其位於旺角嘅網吧生意損失達數十萬元。Eddy話舖頭喺正佔領區樓上，以往大廈大門長開，客人可自由出入，但爆發佔領行動後，管理公司恐發生暴亂將大門長關，流失七、八成客人。此外，佢喺銅鑼灣間中醫館生意同樣急跌七成，為「止血」已要求全體員工下月放假，希望捱過困境。
張華峰對滬港通感樂觀
因「滬港通」遙遙無期，金融界都受累。特許金融策略師協會主席周浩雲話部分證券行為此增聘人手，人數由一個至十多個不等，又投資數以千萬元裝設電腦交易系統，如今計劃開通無期，令業界愁爆。不過，立法會金融服務界議員張華峰仍然樂觀，話部分公司安排員工趁機多熟習內地A股市場，做定功課先喎。
