時間過得很快，眨吓間，不經不覺，原來，香港警方向示威者炮轟八十七顆催淚彈（佢哋話係「催淚煙」），已足三十日滿月。

這一個月裏，不管經歷狂風暴雨、正規警察清場、B隊收錢搞事、黑幫結黨行兇，也驅散不了佔領者死守金鐘、老銅和旺角三個示威區。

金鐘、銅鑼灣和旺角三處佔領區各有本色，性格不同。金鐘多學生，散發乖乖的書卷味，整齊而重紀律。老銅是中產園地，乾淨得嚟講道理。旺角呢！嘩！呢度人人平等無大佬，同時個個都係九哥；無人可以代表你，你又不能代表第二個。一句到尾「冇嘢講」。

旺角佔領區出奇地是最有人氣、人味、人情味的九反之地，超級最能代表真正香港民意的理想烏托邦。

呢度由佔領第一日起，已有可以讓任何人發表任何意見都得的「論壇」，絕對的言論自由開放地，故乜嘢騎呢怪狀的睇法皆有。

尋日，路過彌敦道，有個阿伯塞咗張佢自費影印的A4紙畀我（附圖），一睇，係《推背圖》的預言第四十象卦，籤曰：「一二三四，無土有主；小小天罡，垂拱而治。」影印本上仲手寫解釋：「學運第四次，無土共有民主」；而「天罡」是「北斗星」喎！並鼓勵學生：「學運仍未成功，同學仍須努力」，阿伯還想捉住我聽佢分析，喂！我仲要去關帝廟上香，和到聖法蘭西教堂祈禱呀！請佢哋保佑香港。

當一些高官言而無信、反口覆舌時，人們便寧願問蒼天囉！雖然總是「無語」，但都好過聽啲顛倒是非，扭曲人性的下流偽語。

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps