政壇：搞搞政：插大律師公會聲明泛民輸打贏要

事隔五個月後，當各區佔領行動蔓延到多個旺區，法庭上星期就旺角同金鐘兩地區的佔領行為頒布禁制令，要求佔領人士盡快停止堵塞道路，但竟然有泛民法律界人士呼籲群眾集體違抗法庭命令。

大律師公會前日再發表聲明話，雖然有唔少人認為人大常委會決定對公民及政治權利施加不合理限制，但唔代表市民有權走向另一極端，又話如果有人違抗法庭命令，會令社會逐漸陷入無法律狀態。

本身係執業律師嘅白鴿黨議員「AV仁」何俊仁竟然話，早喺佔領行動爆發前夕，泛民已表明公民抗命係違法行為，又話佔領人士雖然違反禁制令，但唔代表佢哋唔尊重法治，唔明公會份聲明講緊乜。

佢又批評公會平時啲聲明甚有水準，但今次呢份堪稱低水平之作，認為公會嘅解釋無乜邏輯喎。咁都噏得出，真係唔知邊個低水平兼無邏輯。

身為資深大律師嘅公文袋主席余若薇亦死撐話，雖然大律師公會份聲明有一定道理，但認為公會應該喺人大就政改作出決定、警察同反佔中者握手時出聲明譴責呢啲行為，依家因應禁制令而出份聲明係「嚟得太遲」喎。

班泛民啱聽嘅說話就讚，唔啱聽就彈到一文不值，擺明係輸打贏要，佢哋平時開口埋口都話要尊重法治，但依家就為咗爭取普選而視法律如無物，難怪公會聲明形容如今法治「危如累卵，破在旦夕」喇！