政壇：Google創意發明源自「車房」
Google被譽為「打工仔天堂」，記者早兩日終於可以去到「天堂」，但只係參觀咋。不過都大開眼界，見識呢個矽谷總部創意發源地，原來員工free到可以帶埋寵物返工添！
Google X 產品經理 Amanda Kelly「登月」是參考一九七二年阿波羅登月計劃嘅意念，是要把不可能變成可能。
Google嘅Garage「車房」實驗室，讓員工帶同寵物回公司工作。
Google讓員工空閒時「任飲任食」福利，講都講到厭，今次就講吓究竟Google點度橋。你可能聽過Google研究緊無人駕駛汽車、可以傳送WIFI嘅巨型氣球甚至係智能隱形眼鏡，其實意念通通都是嚟自Google X實驗室。
實驗室從來唔會對外開放，Amanda Kelly係Google X產品經理，有份參與無人駕駛汽車項目，佢話Google X有一種好重要嘅思考方法叫做「登月」思考（Moonshot Thinking），最緊要係思維要夠「激」！
為解決世界重大問題，例如點樣令全球所有人都可以上到互聯網，或者有乾淨食水，佢哋會諗一啲天馬行空嘅方法，研究突破性技術。好似佢哋當初發明無人駕駛汽車，其實係為咗解決每年全球有成百萬人死於交通意外嘅問題，佢仲話無人駕駛汽車已喺馬路上試行咗成百萬英里，至今一宗意外都冇發生過。
不過，淨係意念係唔夠，點樣實踐最重要，Google兩年前成立咗名為Garage「車房」實驗室，入面有齊所有軟硬件包括3D打印機及雷射切割機。負責呢個實驗室嘅創新及創意部主管Frederik Pferdt話，只要唔係犯法嘅嘢都可以喺「車房」做，如員工可以帶同家人同朋友一齊嚟諗吓新嘅搞作，就算食飯吹水，甚至連寵物都可一齊帶返工！原來WIFI氣球就係員工喺「車房」諗出嚟。
