政壇：郭偉強獲駕照暫時冇用
話說立法會新會期開始唔夠兩個星期，上周三就因為唔夠法定人數而首次流會，當中勞工界嘅郭偉強就因為差一步未踏入會議廳而做唔成拯救流會嘅「白武士」。佢透露早兩日已經成功考到俗稱「P」牌嘅輕型貨車暫准駕駛執照，遲啲買埋車就可以揸車返工，唔使再日日搭巴士。不過，佔領行動搞到港島區交通非常擠塞，如果家住香港仔嘅佢要揸車返工，肯定遇上塞車，如果因為塞車變成流會罪人就唔好啦！
郭偉強（右）成功考到車牌，興奮到要即時同教車師傅合照。（受訪者提供）
郭偉強話原本計劃喺今年四月考棍波輕型貨車車牌，當時已經學咗一半，不幸遇上立法會「拉布」戰，日日要留喺立法會出唔到去學車，於是就申請將考試押後到十月。佢喺上月重新搵師傅學車，最後只係學咗二十幾個鐘就膽粗粗去考試，點知幸運地考一次就合格攞到車牌。佢話平時經常要周圍去出席活動，加上就嚟結婚，婚後同老婆出外遊玩，揸車點都方便得多喎。
