身兼獨立監察警方處理投訴委員會（監警會）成員嘅立法會會計界議員Kenneth梁繼昌，早前因為喺泛民主派記者會上戴住黃絲帶公開批評警方涉嫌毆打佔領行動示威者，因而被人質疑佢影響監警會處理有關個案嘅公正性，監警會仲因此收到唔少投訴。Kenneth尋日就照樣喺立法會就警方涉毆打示威者事件提出質詢，結果畀建制派圍攻，質疑佢影響監警會嘅公正性。

設計圖片及對白

戴黃絲帶顯立場

Kenneth尋日喺立法會向保安局局長黎棟國提出質詢，就警方涉嫌毆打示威者事件，問警方如接獲警員涉干犯刑事罪行嘅舉報時會點處理，同埋點解喺事件被揭發當日冇即日要求涉事警員停職等。不過，佢一問完就畀建制派不點名寸爆，質疑佢影響監警會公正性。

議員葉國謙率先向Kenneth「發炮」，話個別監警會成員對事件公開作出批評，又對警方處理手法強烈質疑，仲要戴埋象徵撐佔領行動嘅黃絲帶上身，問Kenneth點向警員同投訴人保證監警會可以獨立、公正咁對待有關投訴。其黨友陳鑑林亦都問到監警會有乜嘢制度去處理支持佔領行動成員嘅行事方式，以及點樣令公眾覺得監警會係有其獨立性、會公平處理個案。

其實，依家同佔領行動相關嘅個案已經交畀監警會轄下嚴重投訴個案委員會處理，Kenneth並唔係該委員會嘅成員，已變相避席。就公文袋曾健超涉嫌被警察毆打一事，警察公共關係科總警司許鎮德話正嚴肅跟進，已接觸並去信三個傳媒機構，冀對方提供片段協助調查，但至今仍未取得片段。警方已向曾健超及被停職七警錄取口供，調查完成後會徵詢律政司意見。

第一手消息請下載on.cc東網iPhone/iPad/Android/Windows Phone Apps