城中鏡：勸世姪咪讀醫 梁卓偉倒自己米
入過「熱廚房」嘅Gabriel梁卓偉，離開官場冇耐就成為香港大學醫學院歷嚟最年輕嘅院長，做醫生做到咁有成就，當然唔少人都想向佢請教成功秘訣。Gabriel坦言確有唔少朋友問佢意見，但係佢經常反勸年輕人唔好讀醫科，認真搞笑。
梁卓偉話自己都遇過挫折，但嗰時身在國外。（資料圖片）
Gabriel自爆話好多朋友經常會帶埋仔女同佢一齊食餐飯，希望佢醒幾招畀啲世姪。一餐飯閒閒地兩小時，點知Gabriel就不斷叫人唔好讀醫，一輪嘴話好辛苦，唔係睇電視咁，無程志美（電視劇《妙手仁心》男主角）喎，搞到佢啲朋友唔知好嬲定好笑，鬧佢倒自己米。
佢就話係一番苦心，事關讀醫科嘅成績一定極標青，可能十幾年人生都順風順水，跌都無跌過。但佢覺得一個人愈遲遇到挫敗就愈難起番身，所以要做佢學生就先要學吓點跌喎！咁佢有冇跌過呢？佢就話自己跌嗰陣仲喺國外，但就無透露點跌法同埋跌得幾重囉！
