城中鏡：3D光雕匯演明晚起閃躍
蒸汽火車、舊火車站，以至充滿動感藝術圖案同富本土特色嘅「麻雀」、帆船，甚至國際欖球賽事、太極等，展現香港唔同時期面貌和動力嘅「閃躍維港」3D光雕匯演活動，由明晚起連續兩星期，將喺尖沙咀文化中心同鐘樓嘅外牆一一重現。
「閃躍維港」3D光雕匯演明晚起一連兩周，在尖沙咀文化中心及鐘樓上演。（旅發局提供）
3D光雕匯演展現香港本土文化特色。
活動由香港旅遊發展局籌辦，每晚八時三十分起播放，每半小時一場，合共四場，冀能令巿民同遊客目不暇給。
負責創作今次光雕匯演嘅澳洲Spinifex Group團隊，其創意總監Richard Lindsay曾製作多個國際級創意媒體匯演，包括二○○八年同張藝謀導演合作嘅北京奧運開幕式、二○一○年上海世博同溫哥華冬季奧運等。光雕匯演主要配合明日舉行嘅「美酒佳餚巡禮」，為香港盛事增添活力，故匯演將包含美酒同美食嘅圖案o架！
旅發局亦會喺聖誕期間舉辦嘅「香港繽紛冬日節」，同埋明年嘅「香港新春節慶」等盛事舉辦期間，編排舉行3D光雕匯演，希望吸引更多人參與盛事。
