城中鏡：李美辰驚佔旺唔畀女同事OT
香港活力都會協會舉辦嘅「足動仁心慈善足球邀請賽」，早前喺旺角大球場舉行總決賽，請來一眾香港名宿球員以球會友。身兼香港小型足球總會會長的霍英東家族後人Eric霍啟山到場打氣，和富社會企業主席李宗德女兒Christina李美辰同老公Stanley蔡德昇亦帶埋三個小朋友去玩。Christina講起佔領行動就膽戰心驚，事關佢公司喺旺角，該區連日來火藥味爆燈，唔驚就假。
李美辰（左二）同蔡德昇（右一）帶三名子女齊觀賽。
熱愛小型足球嘅霍啟山大談波經。
吳永嘉（右）同陳建強（左）拍住上搞慈善足球賽。
Christina話旺角平時已經係龍蛇混雜，佔領行動發生後，閒雜人更多，佢擔心女同事太夜放工遇上不良分子挑釁，所以近排都叫同事唔好加班，收工就快快返屋企。Stanley就話有朋友開咗間拉麵店兩年，原本生意唔錯，無奈小老闆資金周轉有限，佔領搞到冇生意做，惟有宣告做埋呢個月就執笠。
擔任慈善足球賽籌委會主席嘅中華廠商聯合會副會長Jimmy吳永嘉亦呻話，有好友因為擔心子女頂唔順社會吵鬧氣氛，寧願退學唔讀，下月轉到澳洲升學咁話。
霍啟山倡玩小足減壓
講番足球賽，Eric話小型足球練腳法最好，好似南美世界級球星咁勁唔係靠身形，而係靠細膩腳法取勝，所以佢鼓勵港人在有限場地玩小型足球，可以減壓兼培養團隊精神。香港活力都會協會召集人陳建強話，進入八強嘅球隊要落力為其配對嘅慈善團體搏命籌款，強身健體之餘又幫到弱勢社群，一舉兩得。
