泛民主派發起全面「不合作運動」，早前「冧友」突襲財務委員會轄下人事編制小組同工務小組委員會，操控政府庫房嘅掌櫃之位，建制派亦老實不客氣，反撲要求後補加入兩個小組，兼幾乎攬晒其他委員會嘅正、副主席，可惜一切已恨錯難返，兩個小組委員會最終由泛民包攬正、副主席，建制派全面收檔。

不過，有建制派議員爆料話，佢哋之間早有共識，唔志在人事編制小組嘅主導權，所以由得泛民攞去喎。

有建制派議員透露，人事編制小組今個立法年度具爭議性嘅開位申請唔多，所以即使根據同泛民嘅協調機制，今年由泛民陣營梁繼昌接棒主席，兼由單仲偕任副主席都冇有怕。建制派樂觀諗法認真「阿Q」，係咪應該考慮埋放番其餘十幾個委員會正、副主席個位出嚟，「有位同享」呢？

不過，建制派放棄得人事編制小組，亦不得不承認工務小組畀泛民攻陷嘅後果，包括就中部水域人工島策略性研究撥款表決等具爭議性撥款「拉布」，相信建制派來年冇覺好瞓喇！

第一手消息請下載on.cc東網iPhone/iPad/Android/Windows Phone Apps