自從愈嚟愈多國產廉價智能手機嘅廠商以所謂「性價比」冒起，喺內地市場，小米對三星嘅影響就特別大喇，事關最新資料顯示，小米已打低三星，成為內地銷量一哥。但收到消息話周四要公布第三季業績嘅三星，為咗重振聲威同埋安撫股東，打算嚟個大減價，將喺內地市場嘅智能手機價格下調百分之十至二十。嘩，咁大手筆，睇嚟三星副主席李在鎔真係下咗好大決心喎！

有分析指三星之所以要等到今時今日先至出手反擊小米，皆因貴為全球智能手機銷量一哥，為咗保持高端形象，故執意唔肯減價。如今行到呢步，睇嚟三星都真係冇晒辦法。

第一手消息請下載on.cc東網iPhone/iPad/Android/Windows Phone Apps