政壇：港金融專才收花紅信心冠全球

金融服務業求職網站eFinancialCareers喺過去兩個月做咗個「全球花紅展望調查」，訪問逾二千位來自香港、新加坡、美國同英國等四個地方嘅金融界人士，結果發現有百分之七十八嘅香港金融專才都預期今年會有花紅收，雖然數字低過舊年嘅百分之八十三，但都高過只得百分之七十一嘅新加坡同英國。就連經濟復甦勢頭最好嘅美國都只係得百分之七十六，信心仲差過香港。有百分之四十三嘅香港受訪者更展望年尾花紅會多過上年，真係對公司信心爆棚。

該網站全球銷售及營銷總監George McFerran話，香港專才對花紅嘅期望其實一直都比其他地區高，今年亦都唔例外，不過對比上年，專才今年對花紅嘅期望已經變得比較現實。