政壇：公文袋多醜聞選戰危
話時話，佔領行動至今已一個月，各方都開始盤點得與失，就算佔中發起人戴耀廷同陳健民都話會返去大學教書，強調唔係退場，但係集會人士到底幾時先會退場，佢哋都講唔到有乜契機，更莫講話退場嘅時間喇！
設計圖片及對白
講到得失咯喎，睇番多個泛民主派政黨，好多參與佔領嘅示威者都話今次佔領係「無大會」，唔少泛民黨派中人落去佔領區，更加畀人批評係「抽水」，似乎進退失據。我哋聽到，白鴿黨同公文袋多個地區支部，對於佔領事件都面對好大壓力，不過壓力就嚟自不同方面，其中由「袋巾傑」梁家傑做黨魁嘅公文袋仲雪上加霜，皆因佢哋休假嘅總策劃幹事Ian黃晙近日捲入涉嫌非禮男子風波，隨時影響下年同後年嘅區議會同立法會選情。
唔辭退黃晙惹爭議
佔領行動固然獲得唔少支持民主自由嘅人力撐，但係亦有唔少人反對，形成社會撕裂。白鴿黨唔少選民都係較為溫和、基層，「佔領」呢種公民抗命方式爭取普選，未必得到佢哋認同，加上佔領影響基層民生日深，白鴿黨地區支部都收到好多市民表明反佔中，而講到激，白鴿黨又唔夠激進泛民激，佔領人士未必會投票畀佢哋。
至於佔領行動一事對公文袋選情未必咁大影響，因為今次佔領者好多都係中產。反而佢哋多個地區支部近日陸續舉行改選，唔少人枱底都紛紛討論Ian，有人預期建制派喺各級選舉都有機會用Ian非禮一案攻擊佢哋，難免會成為負資產，質疑佢點解唔「自行了斷」辭職。睇嚟公文袋都要諗諗點樣拆解呢個炸彈嘞！
