城中鏡：器官捐贈人人做英雄

器官捐贈係無價嘅禮物，令垂危的病者得以重生，捐贈者更加係無名英雄。兩名腎臟受贈者尋日聯同香港柔道代表隊運動員、醫生同贊助商，代表香港移植運動協會參加山頂明德醫院慈善抬轎比賽。

跑手穿上超人嘅服飾，胸前貼上可捐贈器官造型，向捐贈者予以超級英雄嘅形象致敬。

佢哋別出心裁，以超人造型現身，衣服胸前嘅「S」變為可捐贈嘅器官圖案，更將轎身設計成超人電影中「更衣室」電話亭，向「超級英雄」捐贈者致敬，同時呼籲市民支持器官捐贈，搶救生命，人人都可以是超級英雄。

受贈者感謝無私大愛

腎臟受贈者溫玉珍擔任坐轎者，佢喺一九九八年患上腎病，因要洗腎而被迫放棄工作，幸好喺二○○五年獲善心人捐出器官，令佢有機會重過新生，佢好感謝捐贈者同其家人無私嘅大愛。另一名病友陳國明擔任啦啦隊隊長，佢患腎病十多年，二○一○年換腎後十個月便參加毅行者至今，今年更完成咗渣打馬拉松「全馬」添。