每年喺發表施政報告同財政預算案前三至四個月，政府都會開始為兩份報告進行民間諮詢，特首CY梁振英同財爺鬍鬚曾更會同立法會各政黨及不同團體會面，當面聽取意見。今年施政報告同財政預算案諮詢工作由本月中展開，當中建仔就打頭陣成為首個去特首辦同CY及鬍鬚曾會面嘅政黨，而其他建制派亦會陸續在下月同兩人會面，要求在兩份報告中加入各項利民紓困、扶助中小企嘅措施。

設計圖片及對白

雖然泛民黨派每年都會循例同CY及鬍鬚曾會面，提出取消功能界別、推行全民退休保障等訴求。不過，適逢今年因應政改爭議同佔領行動，泛民發起不合作運動，除咗杯葛政改第二階段諮詢外，仲企圖拖垮政府施政，有政界中人就預計泛民今年會順勢宣布擱置同政府會面，以示不滿當局連日處理佔領行動嘅手法。不過，上周泛民飯盒會開會，竟然反高潮地決定今年如常同CY及鬍鬚曾會面，但就由以前各黨逐一會面改為大圍一齊見。

有泛民中人透露，由於各黨覺得往年一小時會面時間太短，於是就叫飯盒會召集人「袋巾傑」梁家傑去信特首辦，要求CY同鬍鬚曾一次過見晒二十三位飯盒會議員，等佢哋可以齊齊表達對來年施政報告同財政預算案嘅訴求。

至於會面地點，平時CY同鬍鬚曾都會喺特首辦或政府總部接見各黨派，但泛民今年就獅子開大口，要求兩人親自去立法會同佢哋會面，以示有關當局對立法會嘅尊重。泛民呢頭高調講咗「不合作」向政府宣戰，迫使當局回應民間對真普選訴求，嗰頭又話要同政府反映對未來施政嘅意見，十足跳草裙舞咁扭扭擰擰，究竟佢哋知唔知自己想點呢？

第一手消息請下載on.cc東網iPhone/iPad/Android/Windows Phone Apps