楊明標（右）同太太楊區寶琪尋日出席馬場盃賽活動。
唔少商舖同食肆因為佔領行動堵路影響令生意額大跌，尋日喺馬場見到東方表行集團主席楊明標，佢喺幾個佔領區都經營多間店舖，佢話依家生意比起○三年沙士疫情同六七年暴動時更加難做。喺佔領行動同內地反貪腐政策雙重打擊下，生意大跌近九成，公司不得不轉變策略，唔單止要改售中價位錶款，連帶廠商都要轉埋。
楊明標話從事鐘錶行業已經有約六十年，依家幾乎係公司開業以來最艱難嘅時刻。佢話當年沙士疫情同六七年暴動期間，雖然客量大減，但公司依然有錢賺，且兩次事件時間都唔長，影響未算深。不過，今次佔領行動未知何時完結，而呢段時間內店舖有任何損失，保險公司都唔會賠，所以佢哋要非常小心。
佢話現時貴價腕錶會全部放入保險箱，有客人要買先拎出來，而部分位於旺角等較混亂區域的分店，則會跟隨其他大商戶例如金舖等喺需要時關門。
第一手消息請下載on.cc東網
