政壇：高佬賢促為海鮮開路
由學生罷課演變為佔中三子宣布提早「佔中」行動，包括金鐘、銅鑼灣同旺角嘅佔領行動持續近一個月，因為示威者留守佔領區，現場除咗有大量帳篷之外，佢哋仲架設咗好多路障，堵塞多條主要通道，仲經常發生佔領與反佔領者衝突，就連各行各業都受到影響。
設計圖片及對白
價錢同貨量大打折扣
最近，有唔同業界代表都陸續發聲，指佔領行動對佢哋造成好大影響，例如運輸團體批評佔領人士阻塞要道，搞到職業司機做唔到生意；飲食業就話生意額暴跌，分分鐘減薪、裁員，甚至執笠。
唔單止咁，原來佔領影響已經由陸地蔓延至海上，尋日喺一個活動遇到立法會漁農界議員「高佬賢」何俊賢，佢亦提到唔少業界人士因為佔領區堵路而出唔到貨，得番三、四成生意額。
高佬賢話受佔領行動影響，包括紅隧、東隧同西隧等三條主要過海隧道經常塞車，漁民由香港仔運貨出市區非常不便，加上運送時間耐咗，海鮮已經冇咁新鮮，無論價錢同供貨量都大打折扣。另外，漁民唔少貨都係運去港島區嘅酒店同酒樓，呢啲食肆亦因為生意額下跌，唔會再好似以前咁要咁多貨，漁家嘅收入自然大不如前，惟有搵多啲渠道出貨。
咁又係嘅，所有食材都係新鮮先好味，送遲咗，海上鮮變咗死魚，仲邊有食客吼吖！再加上唔知呢場佔領行動幾時先結束，漁農業界真係要諗吓方法自救先得嘞！
再講，家住元朗嘅高佬賢平時出入都靠揸車，佢話近期都搭多咗交通工具，而且冇乜嘢事都唔會去旺角食飯。適逢尋晚高佬賢堂家姐喺旺角擺酒，佢話呢啲情況就避無可避嘞！
