SUN搞作：少膽虫手記：邊有認錯
「少膽虫，我好慶……」淫賤黎面泛微紅，一臉嬌嗔。「腦細，慶你就開大啲冷氣，同我講都無用。」少膽虫晨咁早畀人叫入房，唔通又要淪為發洩工具？淫賤黎一施蘭花手，「妖，唔好講啲咁嘅嘢啦！人哋依家成身火，你明嘅。」
「哦，腦細你要涼茶下火，我即刻拎畀你……」淫賤黎一手擁少膽虫入懷，「啪啪」聲此起彼落。「少膽虫，你明知我成肚火，嬲到慶合合，仲敢講茶？」淫賤黎磨拳擦掌，似嫌未打夠少膽虫。口腫面腫嘅少膽虫不明所以，「腦細，茶都得罪你？」淫賤黎嬲到面如紅棗，「我呢排飲茶都畀人鬧漢奸，你叫我情何以堪？」少膽虫估唔到原來淫賤黎都知咩係禮義廉，「腦細，知恥近乎勇，依家改過都唔遲！」
淫賤黎疑惑問︰「改咩？我畀人認錯，唔通叫我整容？」「認錯人？」輪到少膽虫唔明。「明明李漢奸唔喺度，但就嗌我漢奸，仲唔係認錯人咩？」
