城中鏡：任志強退而不休兼五職
內地華遠地產前晚公布咗新一屆董事候選人名單，揀咗孫秋艷、孫懷傑、楊雲燕、張蔚欣、唐軍同陳曉玲做公司第六屆嘅非獨立董事候選人。咦，點解現任董事長任志強榜上無名嘅？佢喺微博解釋，今年五十三嘅佢打算退休，等到下個月股東大會通過新董事名單，咁就可以正式卸任喇！同佢老友鬼鬼嘅SOHO中國董事長潘石屹都戥佢高興，喺微博度祝佢「歡慶＠任志強光榮退休」。
潘石屹（左）喺微博恭喜任志強（右）榮休。（資料圖片）
「任大炮」想做作家
不過心水清嘅各位就會知道佢今次卸任都唔係真正嘅退休，皆因佢仲身兼五職，尋日喺記者會度話，會繼續擔任中國房地產協會、房地產研究院副會長、全聯房地產商會執會長、阿拉善生態協會會長同金融博物館書院院長，真係名副其實嘅「退而不休」。
任志強仲好幽默咁講笑話要整間房地產研究院，畀個院長自己做，得閒時再做埋作家，搞下學術研究喎。雖然外界都叫佢做「任大炮」，因為佢每次言論嘅「創作力量同幻想會嚇你一跳」，但有啲擔心佢不甘寂寞，退休之後分分鐘忙過之前。
