公共交通國際聯會（UITP）前日舉行亞太區會議午餐會，立法會議員「田二少」田北辰亦有出席。尋日佢就喺社交網站上載咗幾張活動相片，話主人家九巴安排咗啲身穿懷舊售票員同稽查員制服嘅模特兒，向在場嘅嘉賓派發一張面額一毫子嘅仿古懷舊車票。

田北辰（右）同身穿懷舊制服嘅模特兒，展示仿古一毫子巴士車票。

田二少收到仿古懷舊車票之後，除咗即刻影番張相留念外，仲即場考考啲模特兒知唔知幾時嘅九巴車費係一毫子？點知冇人識答。最後佢開估話係一九三○年代，根據《1934年香港年鑑》所述，當時由尖沙咀往九龍城嘅巴士二等座位收費係一毫子，頭等就要毫半子嘞！

第一手消息請下載on.cc東網iPhone/iPad/Android/Windows Phone Apps