政壇：搞搞政：泛民嚴人寬己 拒建制補飛入小組
泛民主派為咗配合佔領行動，於是喺立法會內發起不合作運動，早前仲成功「佔領」財務委員會轄下嘅工務同人事編制兩個小組委員會多數議席，建制派當然要「補飛」啦！工務小組尋日開會，首要處理嘅係十二位建制派議員逾期加入小組委員會嘅申請，但係由泛民推舉為小組主席嘅「袋巾傑」梁家傑一開波就話，只有因病或未及回港而遲交嘅申請先可以批准，又話工務小組已積壓好多議程，為免影響審議工程項目，建議另開特別委員會處理呢啲遲交嘅申請喎，擺明就係玩嘢。
大舊：賴助理唔公道
議員「大舊」陳偉業聽到就即時附和，話自己上屆想申請逾期加入人事編制委員會，頂替因衝擊替補機制論壇而入獄嘅議員梁國雄繼續「拉布」，但當時建制派就一面倒反對，所以佢今次都好想聽吓建制有乜解釋喎。佢仲寸爆話早前聲稱因助理一時大意，搞到要後補加入委員會嘅議員鍾樹根，將責任賴落助理度好唔公道。
當年建制派冇阻撓
樹根聽完就批評泛民剝奪議員加入委員會嘅權利，係好唔公義，認為議員要入委員會「應入就入，要出就出」，唔應該受限制。議員譚耀宗更加批評泛民「人多蝦人少」，浪費議會時間。據了解，建制派為免「被審」，加上泛民冇可能放生佢哋，所以都唔考慮出席特別會議。
其實喺○三年泛民議員麥國風逾時申請加入《國家安全（立法條文）條例草案》委員會，同一○年議員何秀蘭及張國柱逾期申請加入研究法定最低工資附屬法例的小組委員會，建制派都冇阻撓佢哋。今次證明泛民又多項嚴人寬己嘅證據喇！
