根據科技網誌MacRumors嘅消息，蘋果公司（Apple Inc.）同藍寶石玻璃屏幕製造商極特先進（GT Advanced Technologies）終於達成協議，極特要賣咗佢哋喺亞利桑那州工廠裏頭嘅全部藍寶石熔爐，用嚟償還欠蘋果嘅債務。
原來之前Apple畀咗4.4億美元畀極特嚟購置藍寶石生產設備。喺十月初，極特卻宣布申請破產保護，同Apple結束合作關係。呢次極特將出售亞利桑那州Mesa工廠裏頭2,039座藍寶石熔爐嚟償還拖欠Apple上述嘅一筆款項。
極特嘅律師就話雙方嘅合作結束可以話「和平而友好的」。而極特將不再向蘋果索償，並同意唔會做出貶低Apple嘅事（先前極特曾指摘Apple嘅合約既壓抑又繁重）。之前亦有傳言話，極特曾想畀Apple接手藍寶石玻璃工廠。無論如何，喺Apple最新嘅iPhone 6同6 Plus手機上，並冇採用藍寶石玻璃屏幕，係咪令人覺得有啲失望呢？
第一手消息請下載on.cc東網
