政壇：梁美芬屋企頻為佔中鬧交
佔領行動令香港社會嚴重撕裂，由屋企到學校再到社區，好似已經分成只有撐佔中同反佔中兩大陣營，唔少家庭都因為咁而家嘈屋閉。聽聞立法會議員梁美芬都因為咁而出現家庭糾紛。佢就坦言，屋企人有唔同職業，有社工又有警察，自然有唔同觀點，但佢就負責做「和事老」，專責調停家中糾紛。
設計圖片及對白
傳與胞妹意見相反
呢幾日有政界傳言話，梁美芬同妹妹由於對佔中持相反意見，結果同阿妹喺屋企經常嘈交。尋日我哋問佢係咪真有其事，佢就尷尷尬尬話唔講屋企事喇。不過，佢就承認，家族中的確有唔同成員對佔中有唔同意見，因為有家人做警察，又有人做社工，大家睇法自然好唔同。嘩，有警察又有社工，兩陣營水火不容，梁美芬家中咪日日上演六國大封相？
梁美芬話職業令人對佔中有唔同睇法，但點都估唔到有屋企人係同一種宗教信仰，都因為佔中而拗到面紅耳熱，所以佢喺屋企就唔多講嘢，只會負責叫大家冷靜啲，唔好咁激動。
籲學生政府多溝通
除咗屋企，梁美芬話自己喺過去兩、三星期都有落去金鐘、旺角同班學生傾偈，好似上星期仲同班留守金鐘佔領區嘅學生傾咗個幾鐘，傾完後發覺絕大部分留守人士都係和平理性，但旺角就複雜少少，滲入唔少非學生人士留守。但總括嚟講，梁美芬認為政府應該多同學生溝通，總好過無對話喎。
