facebook（fb）創辦人「朱仔」朱克伯格一向多花臣，繼參加冰桶挑戰慈善籌款同請咗個十八歲後生仔之後，佢又有新搞作，到底係乜嘢呢？聽聞佢好似為咗打開中國市場，將會進身成為清華大學經濟及管理學院顧問委員會成員，令自己喺中國嘅地位有所提升。

facebook創辦人朱克伯格

中國內地由○九年開始就唔畀市民使用fb，一眾網民都惟有諗辦法「翻牆」使用。雖然要喺短期內令呢個限制消失似乎冇乜可能，但今年fb竟然喺北京租咗寫字樓，睇嚟長遠嚟講中國民眾上fb「不是夢」喎！

再加上朱仔依家入埋呢個由二○○○年已經創立、由超過四十位蜚聲國際嘅跨國公司董事長、總裁同學者組成嘅委員會，朱仔喺內地嘅影響力一定大大增強。仲有風吹，今次同朱仔一齊做顧問嘅仲有國際商業機器（IBM）主席兼行政總裁羅梅蒂（Ginni Rometty）同全球最大啤酒集團安海斯─布希英博集團（Anheuser-Busch InBev NV）行政總裁Carlos Brito。嘩，咁威水，大家可以同我一齊期待下圍牆倒塌嘅一刻喇！

第一手消息請下載on.cc東網iPhone/iPad/Android/Windows Phone Apps