自從佔領行動爆發後,唔少人返工放工都受阻,有時仲行多咗路添。健康快車創會主席兼籌委會主席「小吉」方黃吉雯就話,佢每日都習慣袋住個「計步器」出街,計算每日行咗幾多步,如果行唔夠目標步數,放工後會去行多一陣,除咗保持身體健康外,仲備戰下月底喺清水灣鄉村俱樂部舉行嘅健康快車慈善跑步行。不過,小吉因為腳痛,所以唔可以跑得好快。

方黃吉雯每日都會帶埋個計步器出街,務求每日達到行一萬步目標。

計步器

毛翔明比較鍾情游水,所以好少喺俱樂部打高爾夫球。

黃帆風每朝都有太太陪伴一齊漫步南灣健身。

小吉話統計過平時每日返工放工,其實大概只係行到三千步左右,想要達到每日行一萬步嘅健康目標,就一定要收工之後再額外去行。其實佢呢個習慣已經喺五、六年前開始,一直保持到依家。為咗方便帶個計步器出街,佢買衫時仲會留意埋件衫或條裙有冇袋添,如果冇嘅話,佢就會另外加個袋仔喺件衫裏面或將個計步器放入手袋。

黃帆風操開冇有怕

博愛醫院永遠顧問黃帆風係清水灣鄉村俱樂部嘅常客,佢覺得俱樂部環境非常舒服,會定期帶觀塘區嘅市民入去參加活動,一齊享受咁靚嘅大自然,而今次慈善步行就正係一個好好嘅機會,畀多啲市民接觸呢個好地方喇。

而黃帆風今次會參加五公里組別嘅慈善步行,但估計應該唔需要特別去練習,事關佢每朝早返工前都會同太太在南灣步行約半小時喎。

相反喺清水灣工作嘅鄉村俱樂部副總經理毛翔明,日日對住個俱樂部高爾夫球場,但就冇乜點打高爾夫球,佢話因為自己比較熱衷游水喎。咁對住個高球場咪好嘥囉?

第一手消息請下載on.cc東網iPhone/iPad/Android/Windows Phone Apps