SUN搞作：打橫嚟講：一定無實質成果的對話，但荒謬！

世情荒謬之處，乃係，全港市民（包括廢柴政府官員），以至全球人類，皆事前對這「關乎香港未來福祉」的政治騷，一律都不存寄望、唔睇好，兼預知一定沒有實質成果的，但全人類卻對此十分關注，總覺得「傾住先」，好過「無得傾」。

香港廢柴政府的取態與學生（包括全港市民）的訴求，由始至終都南轅北轍，各立邊端，真係「對話與對話之間有好大對話空間」囉！

香港廢柴政府派出五件所謂「問責官員」，只是同一口徑的「傳聲筒」，講來講去都係「讀舊稿」，無一個有拍板話事權的人，真實，叫一個讀稿員來便是。有兩件係「啞」嘅，即係「廢」嘅！其他兩件係嚟陪襯，壯膽都要嘅！

香港學生代表，又並不足以代表全港市民喎！家陣，呢場「韌啤拿革命」一早話咗無大佬的，又「無人可以代表我」的「自己地方自己救」嘅自發運動！加上，各政黨社團虎視這鋪揚名立萬的「政治肥豬肉」，五個學生仔又點樣拆得掂呢？

當廢柴官員只能重施「人肉錄音機」的賤招，以表效忠佢哋阿爺，宣讀過時舊稿時，有無想過，這不特止沒有平息民憤民怨，沒有奪得市民的廣泛支持，反而更惹人反感的呢？

直播對話的荒謬，就係政府本想利用今趟機會「打低」學生仔；但現在全球人類看到學生仔進逼得(才豆)緊香港市民公帑的官員，只懂幫大陸講好話而狂噏三幅被廢話，並激發更多的香港人佔領街道爭取應有的民主權利，下次「和談」是否要改為「密室交易」就算呢？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府