政壇：搞搞政：發叔自資出語錄研究中心有工開
早前都講過，新界鄉議局研究中心大半年前成立以來蛋都冇生隻，身兼中心主任、月入七萬多元嘅鄉議局執委薛浩然自然成為眾矢之的。話口未完，薛浩然尋日喺鄉議局會議上終於宣布「有嘢做」，就係為主席劉皇發出語錄，名為《為誰風露立中宵－劉皇發言論集》，齋聽個名已經相當有霸氣。
發叔自一九六○年代由村長開始做起，由村公所、鄉事委員會到加入鄉議局，後更獲委任為《基本法》起草委員會草委，從政五十多年來自然金句多多。發叔笑稱，言論集由佢自資出版，考慮免費派發，正好畀大家睇吓佢當年預言中唔中喎。不過，中唔中就後話，但佢每年農曆年初二去車公廟求嘅籤就似乎好準嘞。
言論集不但輯錄咗六十篇發叔多年來出席重要場合嘅發言，薛浩然更親自執筆、撰寫發叔小傳，包括發叔成長過程、名字由來以至發叔媽媽言傳身教等。被指「冇嘢做」嘅薛浩然解釋，中心六月先開始登報請人，員工八月至返工，但中心啟動兩個月，除咗出版發叔語錄，已經整理緊其他著作，唔係白(才豆)人工o架。咁唔知佢份糧又係唔係八月先開始(才豆)呢？
