由於佔領行動持續佔領港九旺區已經幾個星期,令到已為人父嘅立法會議員Ben陳恒鑌都為天倫之樂選址頭痕,但身兼大嶼山發展諮詢委員會委員嘅佢就靈機一觸,繼去年暑假一家三口去大嶼山長沙海灘住宿「冷氣帳幕」一試難忘後,日前再赴大嶼山另一旅遊勝地塘福,試住外國盛行嘅露營車(caravan)。阿Ben住後大讚露營車概念,仲力撐大嶼山可以倣效台灣鼓勵民宿產業添!

陳恒鑌難得抽空陪囡囡去塘福試住露營車。(受訪者提供)

向來係廿四孝父親嘅阿Ben笑言,自佔領行動展開後,搞到佢都少咗好多時間陪囡囡,加上囡囡成日扭計去旅行,為滿足囡囡願望之餘,又唔想下下搭飛機舟車勞頓,決定帶佢去塘福試住露營車。露營車日租千多元,喺郊外都有舒適住宿,煮食爐具亦一應俱全,夜晚踏出車外就可以睇到滿天星星,好有台灣民宿feel(感覺)咁話。

阿Ben慨嘆香港絕對有條件發展民宿產業,所謂「去到嘅就係公園,去唔到嘅只係爛地」,發展唔一定係破壞,一草一木都唔掂得亦唔見得係保育,希望政府正視問題。

第一手消息請下載on.cc東網iPhone/iPad/Android/Windows Phone Apps