雖然全城等了又等，滬港通仍然未有開車聲氣，但無阻市場為滬港通作各式各樣嘅準備。其中「為咗滬港通，真係可以去到好盡」嘅港交所，啱啱就發現，佢哋要專登請人(目及)實滬港通嘅交易活動，確保呢個史上大製作，運作暢順。睇得出港交所行政總裁李小加（圖）對滬港通真係好着緊。

港交所專登請人(目及)實滬港通交易活動，可見李小加幾着緊。（資料圖片）

港交所將會招聘市場營運科高級副總裁，專門負責滬港通交易活動嘅市場監察。港交所講明，要求要有好高水平嘅市場監察，適合人選將會領導一小隊下屬，每日監察滬港通北向及南向交易活動，並會向市場營運科主管匯報，而且仲要同監管機構及港交所其他部門合作，確保有效嘅市場監管工作。

睇嚟，港交所真係好重視滬港通嘅市場監察工作。事實上，早前已聽聞，由於預料大戶對北向交易（買賣A股）需求強勁，投資額度好快「爆滿」，為防霸佔額度，港交所將會加強監察北向交易活動。所以，如果有人以為滬港通係新事物，想乘機渾水摸魚，睇怕都唔係咁容易！

第一手消息請下載on.cc東網iPhone/iPad/Android/Windows Phone Apps