平日經常以四眼示人嘅立法會旅遊界議員姚思榮近日突然唔再戴眼鏡，望落仲好似後生咗十年添，莫非佢想學後生仔女改戴隱形眼鏡扮後生，抑或佢做咗激光矯視呢？姚思榮話佢雙眼一直好健康，只係有啲老花，但上月做例行眼科檢查時發現患上初期白內障，醫生建議即時做完白內障切除手術，點知手術後連老花都消失埋，唔使再戴眼鏡，實在喜出望外。

姚思榮做完白內障手術後唔使再戴眼鏡，望落後生咗好多。

姚思榮話平時做白內障手術起碼要休息一至兩日，但新技術可以即時清除眼內混濁嘅晶體，手術後休息幾個鐘就已經無事喇！雖然唔使再做「四眼一族」，但姚思榮話有時仲係唔記得自己已經冇戴眼鏡，每日起身嗰陣都要諗幾秒先醒起。睇嚟佢仲要多一段時間先可以習慣無眼鏡嘅日子喇！

第一手消息請下載on.cc東網iPhone/iPad/Android/Windows Phone Apps