SUN奇古怪：SUN潮語：【光明磊落】
「雨傘運動」不經不覺已昂然踏入第三周，就好似一套電影一樣，三個禮拜就差不多落畫。到底爭取民主嘅學生同市民能否堅持下去？真係一個謎。政府自運動開始以嚟，完全無正視過示威者嘅訴求，用大量非正常嘅手段，試圖去平息佔領。人哋示威者三番四次企圖將事件拉回談判桌，但係政府依然不斷拖延。下星期就係大陸開「四中全會」，好多人相信呢個係政府嘅死線，中央希望要喺開會前解決事件。稍為清醒嘅人都會明白，政府寸步不讓，示威者又點會無緣無故結束佔領？所以，政府惟有用其他手段去處理。呢啲手段合理嗎？乾淨嗎？合乎香港利益嗎？唔緊要，從今次事件已經睇到晒政府嘅無能與失敗。二十幾萬月薪嘅新聞統籌專員，可以連辨別真假新聞能力都欠奉，將網上改圖假新聞照樣發表，更唔好提警察「光明磊落」地涉將無反抗嘅示威者拖入暗角打鑊甘！
自「雨傘運動」爆發以嚟，潮語真係一浪接一浪，可能我先至係運動最大得益者。「光明磊落」呢個潮語，係由香港特區警察發明，本來意思好正面，即係做事見得光，對得住天地良心。但係由警察去演繹，就變成完全相反嘅意思，事緣係有「四點鐘許Sir」之稱嘅警察公共關係科警司許鎮德，喺每日四點鐘嘅記者會向記者及全港市民表示，警方嘅行動會係「光明磊落」，但係同一日嘅深夜至凌晨，有示威者衝落龍和道，警方採取武力清場，有被制服嘅示威者，涉被警員拖入暗角，放喺地上「拳打腳踢」，全程被電視台記者拍低晒。
於是，大家對光明磊落有新嘅定義，潮語「光明磊落」嘅意思，原來即係「暗角打鑊」。如果日後有警察同你講，或有其他人士同你表面要「光明磊落」，意思可能即係要拖你入後巷打你一身，大家不得不小心！
香港到咗今日，已經去到黑白不明，是非不分嘅社會。「光明」即係「黑暗」。光明到底何時會重現香江？
