話時話,西九文化區管理局成立至今接近六年,唔少董事局成員都係「開荒牛」,由於政府委任公職有不成文「六六原則」,其中一項係同一人唔能夠擔任同一公職超過六年,所以最近傳出好多消息,話政府究竟應該將董事局班開荒牛請離場抑或盡量少變動,都有好多懸念。政府尋日刊憲,公布未來兩年委任,留同走各半,但最值得關注嘅係唯一嘅泛民主派代表、立法會議員「單雞」單仲偕退下後冇人接替,莫非泛民唔肯加入?

設計圖片及對白

單雞解釋話,民政事務局常任秘書長馮程淑儀九月中問佢有冇興趣續任兩年董事,但佢話白鴿黨以往批評政府諮詢委員會唔應該違反「六六原則」,因佢已被委任六年,冇理由帶頭犯規,所以婉拒邀請。咁點解唔搵其他泛民人士頂替單雞個位呢?

傳恐不合作運動延入

政府中人話,其實有考慮過幾個泛民人士,但呢個人既要所屬專業界別有代表性,又要有政黨背景支持,加上要對文化有所認識,最終都係揀唔落手。有政界中人就分析,話現時泛民全力參與佔領行動同發起不合作運動,近期唔少人仲陸續或打算集體辭去公職,就算搵到合適人選,話唔定對方風頭火勢,未必肯應承幫手。

今次離任有七人,但新委任只有六人,就係冇人頂替單雞個位,相信當局都係謀定而後動,之後再替補都唔遲。

講番其他委任人選,「三朝元老」發展委員會主席夏佳理、博物館委員會主席羅仲榮同表演藝術委員會主席盛智文全部有得留低,夏佳理仲做埋新設嘅副主席一職。立法會工程界議員盧偉國就頂替黨友林健鋒個位,其他仲有資深測量師溫文儀、鍾情藝術嘅新世界發展執董鄭志剛、畫家雕塑家包陪麗、表演藝術家毛俊輝同知名設計師靳埭強。

第一手消息請下載on.cc東網iPhone/iPad/Android/Windows Phone Apps